Nədən istifadə etmisən?

Posted by: mkazim on: Fevral 2, 2009

• In: Dilimiz
• Şərh yaz!

Milli məktublaşma serverlərimizdən birində çox rast gəlinən bir cümlə: “Gələnlər qovluğunuzun filan qədərini istifadə edirsiniz”. Axı hamımız bilirik ki, burada “qədərindən” işlədilməlidir. Serverə böyük hörmətim var, Azərbaycanda yeganədir, ancaq belə hallar qəbulolunmazdır.  Istər bu server olsun, istər tanınmış xəbər saytı, hamısının böyük ictimai məsuliyyəti var. Odur ki, gərək nə yazdıqlarına, necə yazdıqlarına arabir göz gəzdirsinlər. Xalqın təhsili onsuz da bərbad gündədir. Belə hallar isə, kiçicik də olsa, ümid vermək əvəzinə ümidlərimizi puça çıxaranda bədbinliyə  qapılıram. Bədbinliksə, hər vəchlə qaçınılmalı bir şeydir.)

Yuxarıdaki dil qəlibinin Turkiyə təsirin daha bir nümunesi olduğundan şübhələnirəm (“birşeyi kullanmak” ifadəsini yadınıza salın). Ümumiyyətlə, Türkiyə ilə dil baxımından bu qədər yaxın olmağımız linqvistik imkanlarımızı nə qədər genişləndirirsə, Azərbaycanda danışdığımız türkcənin qorunmasını bir o qədər də çətinləşdirir. Bu mövzuda deyəcəyim çox şey var, intəhası, dağınıq fikirlərimin çərpələngi havalanmaq üçün gilavarını gözləyir.